గణతంత్ర దినోత్సవం వేళ తెలంగాణ పోలీసులకు పతకాల పంట.. హెడ్ కానిస్టేబుల్‌కు 'శౌర్య పతకం'

గణతంత్ర దినోత్సవ వేడుకల సందర్భంగా కేంద్ర ప్రభుత్వం ప్రకటించిన ప్రతిష్ఠాత్మక పోలీస్ పతకాల్లో తెలంగాణ సత్తా చాటింది. రాష్ట్రానికి చెందిన మొత్తం 23 మంది సిబ్బంది ఈ పురస్కారాలకు ఎంపికయ్యారు. విధి నిర్వహణలో అసాధారణ ధైర్యసాహసాలు ప్రదర్శించిన వారికి ఇచ్చే 'శౌర్య పతకం' ఈ ఏడాది తెలంగాణ నుంచి ఒక్కరికే దక్కింది. సైబరాబాద్ కమిషనరేట్‌లో హెడ్ కానిస్టేబుల్‌గా పనిచేస్తున్న మర్రి వెంకట్‌రెడ్డి, తన ప్రాణాలను పణంగా పెట్టి చూపిన సాహసానికి గాను ఈ అత్యున్నత పురస్కారాన్ని ద‌క్కించుకున్నారు.

కేంద్ర హోంమంత్రిత్వ శాఖ విడుదల చేసిన జాబితా ప్రకారం.. ఇద్దరు అధికారులు పోలీసు శాఖలో అత్యున్నతమైన రాష్ట్రపతి విశిష్ట సేవా పతకాలకు ఎంపికయ్యారు. ఇంటెలిజెన్స్ సెక్యూరిటీ వింగ్ (ISW) అదనపు ఎస్పీ మంద జీఎస్ ప్రకాశ్ రావు, సీఐ విభాగం ఎస్సై అను దామోదర్ రెడ్డి ఈ గౌరవాన్ని పొందారు. వీరితో పాటు రాష్ట్ర పోలీసు శాఖలోని వివిధ విభాగాల్లో ఉత్తమ సేవలు అందించిన మరో 12 మంది సిబ్బందికి 'ఉత్తమ సేవా పతకాలు' లభించాయి. ఐజీ స్థాయి అధికారి నుంచి కానిస్టేబుల్ వరకు ఈ జాబితాలో చోటు దక్కించుకోవడం విశేషం.

అగ్నిమాపక, జైళ్లు, హోంగార్డుల సిబ్బందికి కూడా దక్కిన గౌరవం
ఈ పురస్కారాలు కేవలం పోలీసులకే పరిమితం కాలేదు. అగ్నిమాపక, జైళ్లు, హోంగార్డుల విభాగాల్లోని సిబ్బంది సేవలకు కూడా గుర్తింపు లభించింది. ముగ్గురు అగ్నిమాపక సిబ్బంది, ఇద్దరు జైళ్ల శాఖ అధికారులు, ముగ్గురు హోంగార్డులు కేంద్ర పతకాలు అందుకున్న వారిలో ఉన్నారు. ముఖ్యంగా కఠినమైన శిక్షణకు, సాహసోపేతమైన ఆపరేషన్లకు పేరుగాంచిన గ్రేహౌండ్స్ విభాగంలోని హోంగార్డులకు పతకాలు రావడం వారి అంకితభావానికి నిదర్శనం. రాష్ట్రంలో శాంతిభద్రతల పరిరక్షణ, నేరాల నియంత్రణలో సిబ్బంది చూపుతున్న ప్రతిభకు ఈ పురస్కారాలు ఒక గుర్తింపు అని ఉన్నతాధికారులు పేర్కొన్నారు. పతక విజేతలకు రాష్ట్ర ప్రభుత్వం, పోలీస్ ఉన్నతాధికారులు అభినందనలు తెలిపారు.

ఉత్తమ సేవా పతకాలు పొందిన వారు: బడుగుల సుమతి (ఐజీ, ఎస్సైబీ), అట్లూరి భానుమూర్తి (సీనియర్‌ కమాండెంట్, టీజీఎస్పీ 8వ బెటాలియన్), పగుంట వెంకట రాములు (కమాండెంట్, టీజీఎస్పీ 13వ బెటాలియన్), మొగిలిచర్ల శంకర్‌రెడ్డి (డీఎస్పీ, సీఐడీ), తుమ్మల లక్ష్మి (డీఎస్పీ, పీటీసీ, అంబర్‌పేట), బుర్ర ఎల్లయ్య (ఎస్సై, వేములవాడ), కేవీఎం ప్రసాద్ (ఏసీపీ, సైబర్‌ క్రైమ్స్, హైదరాబాద్‌), సి.వంశీమోహన్‌రెడ్డి (డీఎస్పీ, పోలీస్‌ కంప్యూటర్‌ సర్వీసెస్‌), వి.పురుషోత్తంరెడ్డి (ఆర్‌ఐ, టీజీఎస్పీ, 5వ బెటాలియన్), బొడ్డు ఆనందం (ఏఎస్సై, పెద్దపల్లి), పైలి మనోహర్ (హెడ్‌కానిస్టేబుల్, ఎస్పీఎఫ్‌), సయ్యద్‌ అబ్దుల్‌ కరీం (ఎస్సై, సీఐ సెల్‌).

ఇతర విభాగాల విజేతలు: హోంగార్డులు: రవి మసరాం, జంగయ్య పిట్టకల, రేణుక బుర్రనోళ్ల (అందరూ గ్రేహౌండ్స్). 
జైళ్లశాఖ: సుధాకర్‌రెడ్డి మూలగుండ్ల (డిప్యూటీ జైలర్‌), అశోక్‌ కుమార్‌ కురిమిండ్ల (అసిస్టెంట్‌ డిప్యూటీ జైలర్‌).